DAKBAYAN SA OZAMIZ — Gi-imbistigahan karon ang tulo ka barangay kapitan ning siyudad tungod sa alegasyong anomalya sa pagpang-apod-apud sa hinabang sa Social Amelioration Program (SAP) nga kuarta gikan sa Department of Social Welfare and Development (DSWD).
Sa pakighinabi kang Mayor Ando Oaminal, iyang gibutyag nga dunay siyay nadawat nga mga reklamo nga nagpalusot ang ubang kapitan sa ilang pag panghatag sa ayuda.
Sumala ni Oaminal, sagad sa mga reklamo nga iyang nadawat, mga soud sa kapitan ang kadaghanan sa natagaan , samtang daghan usab ang angayang hatagan nga walay nadawat.
Sa Ozamiz ug sa ikaduhang distrito adunay gipanghatag nga lokal SAP. Ang wala nalista sa SAP sa DSWD ug sa CIC gipangtagaan og 25 kilos nga bugas, tagduha ka manok ug kuarta nga P1,500.
Giklaro ni Oaminal nga kon ugaling man mapamatud-an ang maong mga kapitan, kini masuspenso sa ilang trabaho.
” We have three barangay captains nga under investigation sa karon because of SAP distribution kay nakadawat ta og mga reklamo nga naay palusot, if proven nga naay binuang sa barangay naay atong City Council as disciplining authority and i suspend once proven .” pamahayag ni Oaminal.
Hinuon wala una ibutyag sa Mayor kon si kinsa nga mga kapitan ug kon asa nga barangay sa Ozamiz.- Expedita “Thata” Roxas