DAKBAYAN SA DABAW— Usa sa upat ka Overseas Filipino Worker (OFW) nga namatay sa bomba nga mibusikad sa Beirut, Lebanon niadtong milabayng semana taga Mindanao.
Ang biktima giila nga si Ardel Bustamante Maglangit, 43 anyos, usa ka domestic helper didto sa Beirut, Lebanon, taga Malibangcao, Clarin Misamis Occidental.
Miabot sa Pilipinas ang patayng lawas ni Ardel niadtong Lunes, Agosto 17, kauban ang 386 ka mga OFWs nga mipauli na gikan sa nahisgutang nasud.
Mismong si Foreign Affairs Secretary Teodoro Locsin ang misugat sa pag-abot sa walo (8) ka patayng lawas didto sa Ninoy Aquino International Airport.
Wala mapugngi ni Locsin ang iyang luha sa dihang iyang nakita ang mga OFWs ug ang mga patayng lawas.
Sa iyang mensahe atol sa pagsugat sa mga OFWs, nagpasalamat si Locsin sa mga OFWs sa ilang tabang sa ekonomiya sa nasud, ug samtang iyang gitihok kining mga pulong ” Welcome home! President Duterte welcomes you home. I want to thank the people around me, everyday nandito sila to welcome back our people. We do it because we love you and we do it because we respect our President, the first and only President who has cared for the least of the Filipino. Thank you and for the honor of serving you”, mihilak ang kalihim.
Mahuman na unta ang kontrata ni Ardel sa iyang amo karong Septembre. Apan, wala damha nga makabsan sa iyang kinabuhi gumikan sa pag ulbo sa kasamok sa Beirut ug namatay kini tungod sa pagpamomba.
Giasikaso na sa DFA ug sa Overseas Workers Welfare Administrator (OWWA) ang mga papeles ni Ardel , aron makadawat na kini og hinabang ug benepisyo gikan sa gobierno.
Ang patayng lawas ni Ardel i-agi kini sa sa Zamboanga Airport ug ayha pa dalhon sa lungsod sa Clarin.
Una niini, gipahayag ni OWWA 10 Regional Director Petrona Bergado, nga ang pagbyahe sa patayng lawas ni Ardel giasikaso sa taga OWWA Region 9 sanglit ang address ni Ardel mao man ang Molave Zamboanag del Sur, kay naminyo siya og taga Molave.
Gipahayag usab ni Rogelio, bana ni Ardel, nga dalhon sa Clarin ang patayng lawas sa iyang asawa kay siya lumad nga taga Malibangcao, Clarin, Misamis Occidental.
Wala pa masayri sa pamilya kung unsang petsaha namatay si Ardel didto sa Beirut.-Newsline.ph