DAKBAYAN SA DABAW — Nadakpan sa mga opiratiba sa kapulisan didto sa Zamboanga-Sibugay ang usa ka sub-leader sa Abu Sayyaf Group (ASG) nga nanguna sa pagkidnap ug pagpugot sa ulo sa usa ka adunahang negosyante sa Zamboanga onse (11) ka tuig na ang milabay.
Giila ni Brig. Gen Jesus Cambay Jr., director sa Police Regional Office-9 (PRO), ang naarestong suspek nga si Jamiul Nassalon, 41 anyos, o mas na ilhan sa mga alyas nga Ustadz Amih, Abu Haris, Abu Tii, Abu Janar ug Abu Jamih.
Sumala ni Cambay, si Nassalon naaresto pinaagi sa warrant of arrest niadtong Martes alas 5:30 sa buntag sa Barangay Caliran, Mabuhay, Zamboanga Sibugay.
Si Nassalon adunay tulo (3) ka mga warrant of arrest sa kasong serious illegal detention with ransom ug attempted murder pulos mga walay piansa ug attempted murder nga dunay piansa nga P120,000.
Si Nassalon ang gitudlong mastermind sa pagkidnap ug pagpugot kang Doroteo Gonzales niadtong Abril 25, 2009 sa Barangay Buenavista.
Gipugotan si Gonzales sa mga bandidong ASG human sa napakyas ang iyang pamilya sa pagbayad sa PHP25 milyon. Ang pugot nga ulo ni Gonzales nakit-an niadtong Mayo 17, 2009 sa lungsod sa Al-Barka probinsya sa Basilan.
“Ang kusganong kampanya batok sa mga personalidad nga giila nga nalambigit sa mga grupong terorista, lakip ang mga tawo nga kauban nila, nibunga sa pagkadakop kang Nassalon,” saysay ni Cambay.
“Dili namo gusto nga ilang gamiton ang pandemya aron sila makalihok ug magpaayon sa ilang teroristang laraw,” DUgang sa opisyal.-Winkle Mae M. Tabuclao ug taho gikan sa PNA