Usa na usab ka Parojinog ang namatay

Posted on

DAKBAYAN SA OZAMIZ— Duha ka adlaw human nga mamatay si kanhi Board member Ricardo ‘Ardot’ Parojinog sulod sa Ozamiz City PNP Detention Cell, usa na usab ka membro sa pamilya Parojinog ang namatay.

Namatay niadtong Domingo 7:45 sa buntag ang magulang ni “Ardot” nga si Melodina Parojinog Malingin sa sakit sa kasingkasing. Namatay si Malingin sulod as MHARS Medical Center sa Ozamiz.

Si Malingin napriso sa Ozamiz City Reformatory Jail sukad niadtong Disyembre 2017 gumikan sa pagbaligya og illegal nga droga.

Gipadayag ni Jail Officer 1 Christian Mendez, Jail Nurse, nga dali nilang gidala sa hospital si Malingin niadtong Sabado, alas 6 sa gabii human nga namatikdan nga miubos ang blood pressure niini. Gisulod kini sa Intensive Care Unit (ICU) sa maong tambalanan apan mipanaw na kini Domingo sa buntag.

Sa nakung inpormasyon sa Newsline.pn, “cardiogenic shock secondary to intractable cardiac arrhythmia atrial fibrillation to ventricular tachycardia,” ang hinungdan sa kamatayon ni Malingin.

Nasayran nga niadtong Hunyo 17, gi-operahan si Malingin sa iyang matres ug human sa walo ka adlaw gibalik kini sunod sa bilangguan. Sukad niadto nagsige nalang kini og higda sa iyang katre,

Kahinumduman nga niadtong Septiyembre 4, namatay ang manghod niini nga si Ardot Parojinog sulod sa detention cell gumikan usab sa giingon nga sakit sa kasingkasing, ug sa pagduda nga aduna usab kini Coronavirus disease (Covid-19).

Samtang sa  nakuha nga kasayuran si Ardot nag-negatibo  sa iyang swab test.

Naghangyo ang pamilya Parojinog sa ilang mga kabanay ug kaila nga i-ampo ang kamatayon sa ilang mga minahal sa kinabuhi nga mipanaw ug ilang gipangayo ang ang pagsabot sa publiko sa ilag gipangayo nga pribasiya.-Neptalie Batolenio/Newsline.ph

Be informed
  • 9
  •  
  •  
  •  
  •  
    9
    Shares
  • 9
  •  
  •  
  •