DIPOLOG CITY —– Anaa na karon sa Isolation Facility ang 27 ka piniriso ug 2 ka pulis human sila nag-positibo sa gipahigayong Coronavirus rapid antigen test, niadtong Biyernes, Nobyembre 6).
Sumala ni Dipolog Mayor Dexter Uy, 27 sa 36 ka mga piniriso ug duha ka mga pulis sa Dipolog City Police Station (DCPS) ang anaa sa isolation facility karon
Ang mga piniriso gilangkuban sa duha ka mga minor-de-edad nga nagpangidaron og 16 ug 17 anyos; usa ka senior citizen nga nagpangidaron og 63; 19 ka mga nagpangidaron og 18 ngadto na sa 40 anyos; ug pito ka mga nagpangidaron og 41 ngadto na sa 55 anyos.
Kini nga ihap naglangkob na sa duha ka mga pulis.
Gilakip sa antigen testing ang mga pulis tungod sa ilang exposure sa mga binilanggo.
Sa opisyal nga pamahayag ni Uy nga gipagawas Martes, Nobiembre 10, gihimo ang antigen testing isip rekisitos sa pag-commit sa mga binilanggo ngadto sa Dipolog City Jail.
Una nang gipasabot sa Department of Health (DOH) nga sa rapid antigen testing, kuhaon ang sample specimen sa usa ka tawo pinaagi sa swabbing, agi sa ilong ug sa alingag-ngag gamit ang antigen. Kini susama sa sa himoon sa reverse transcript polymerase chain reaction (RT-PCR) test.
Apan dili sama sa RT-PCR, ang antigen result mahibaw-an sulod lamang sa kinse (15) minutos.
Miingon si Uy nga gilayong gi-quarantine sa Temporary Treatment Monitoring Facility (TTMF) sa siyudad ang duha ka mga pulis samtang ang mga nag-positibong mga bilanggo gilain na gikan sa ilang mga kauban.
“The 27 positive detainees were segregated from the rest of the detainees and their detention cells were installed with plastic covers,” pamahayag ni Uy.
Ang mga ‘close’ ug ‘secondary contact’ sa duha ka mga pulis gi-isolate na usab, dugang sa mayor.
Sa pagpakighinabi sa mga sakop sa media ngadto kang Dr. Jane Jaug sa Department of Health-Zamboanga del Norte, gikumpirma niini nga gibawal na ang pagbisita sa mga pamilya sa bisan kinsang piniriso sa DCPS hangtud nga mahuman ang pag-quarantine kanila sulod sa 14 ka adlaw.
“Close institution man ni. No visitors allowed gyud ta ani sa mga detainees. Nabalda usab ang uban pang mga transaksyon sa station tungod sa pag-isolate sa mga nag-positibo. Padayon nato silang gi-monitor kung adunay mag-develop og simtomas aron atoang i-swab test. We also strictly follow IPC (Infection Prevention Control) measures,” pamahayag ni Jaug.
Hangtud Nobyembre 10, ang Dipolog City adunay natala nga 74 ka mga katibong kaso sa COVID-19 diin ang 31 niini nag-positibo gamit ang rapid antigen test samtang ang 43 nag-positibo gamit ang RT-PCR test.
Siyam ang natalang namatay sa siyudad tungod sa coronavirus sugod sa pandemya niadtong bulan sa Marso.
“We would like to assure the public that stringent measures are being done to help contain the spread of the virus. This apparent spike in the number of positive cases is brought about by our expanded COVID-19 testing efforts pursuant to government-sanctioned protocols,” pamahayag ni Mayor Uy. -Eva S. Mustaril/NewsLine-NorthernMindanao