DAKBAYAN SA DAVAO— Gi-warningan sa Korte Suprema si Davao del Sur Regional Trial Court Branch Judge Mario Duaves human kini napamatud-an nga sad-an kay nagpadala kini og “Text Message” sa tawo nga dunay pending nga kaso sa iyang sala.
Sa unom (6) ka pahina nga resolution nga gipagawas sa Second Division sa Korte Suprema niadtong Marso 17, 2021, gisaysay niini nga nakalapas si Judge Duaves sa “New Code of Judicial Conduct”.
Sa usa ka Press Statement, gisaysay niini nga subay sa rekomendasyon sa Office of Court Administrator (OCA), Duaves “is hereby reprimanded and sternly warned that a repetition of the same or similar act shall be dealt with more severely”.
Buot pasabot, si Duaves “Gibadlong ug istriktong giwarningan nga kung iya kining usbon o maghimo og susamang buhat mag-atubang kini og mas grabe nga silot”.
Gi-admitar ni Judge nga nagbinaylo-ay sila og “text message” sa mga tawo nga dunay pending nga kaso sa iyang sala ug kini mahitungod sa bangi sa propedad.
Ang reklamo batok kang Judge Duaves gipasaka ni Atty. Malanio Prado Jr., ang abogado ni Ramon Angeles, niadtong Pebrero 14, 2019.
Nagsige na og pahimangno ang Korte Suprema sa mga Huwes nga kinahanglan ipakita sa mga membro sa Hudikatura ang ilang pagkamatinud-anon ug ang ilang patas nga panerbisyo.
“Ang sukdanan sa pamatasan ug kaligdong nga kinahanglan mao ang pagtino, labi na ang usa ka maghuhukom kinahanglan nga likayan ang pagkadili angay ug ang dagway nga dili angay sa tanan niya nga mga kalihokan,” ingon sa tribunal.
Matud ni Prado daghang higayon nga nagkig-text si Judge Duaves sa mga tawo nga dunay kalambigitan sa kaso.
Apan, mitubag si Duaves nga walay basehan, walay sukaranan ang alegasyon ni Prado ug kini gihimo aron manghuraw.
Matud sa Huwes nagtext sila sa mga dunay kalambigitan sa kaso aron i-link ra sila.