DAKBAYAN SA DABAW (Agosto 7) — Gipusil patay sa iyang pasahero ang tricycle drayber nga nailhang si Alex Peralta Nobleza, kagahapon alas 8:00 sa buntag didto sa Purok 16, Domingga Village, Calinan, ning dakbayan.
Sumala ni Sarhento Amaguen ug Sarhento Napalit sa Calinan pulis, namasahero si Nobleza, 41 anyos, sa dihang kalit kining gipusil sa iyang pasahero.
Si Vincent Mose Aguilla, tricycle drayber ug silingan sa biktima, nagbutyag sa kapulisan nga samtang nagbiyahe siya sa purok 16 paingon sa purok 15, nakadungog siya ug buto sa pusil gikan sa tricycle nga color yellow nga nauna sa iyang motor.
Matud ni Aguilla, nakakita siya ug usa ka lalaki nga naka-green og t-shirt ug naka maong nga pantalon og nagbitbit ug wala matinong kalibre sa armas ang mikanaug sa front seat sa tricycle ni Nobleza ug nagdali kining misakay sa usa ka itom nga Honda wave nga walay plaka, iyang gibutyag nga ang drayber sa motor naka itom ug jacket ug dali kining misibat sa lugar.
Ang patayng lawas ni Nobleza gidala gilayon sa Angel Funeral sa Calinan, samtang padayong gi-imbistigahan sa kapulisan kung kinsa ang mga salaud.-CACS/NewsLine.ph
