DAVAO CITY — Mahimo nang modula og mga non-contact sports sa mga lugar nga ubos sa General Community Quarantine (GCQ), si Defense Secretary Delfin Lorenzana nagpahibalo ning Miyerkules, Mayo 13.
Si Lorenzana, ang nangulo sa national task force kontra coronavirus disease (Covid-19), nag-ingon nga ang mga dula nga adunay physical distancing sama sa cycling, golf, ug tennis lang usa ang tugotan ubos sa GCQ.
“Ang authorized lang ngayon ay iyong no contact sports like biking, tennis siguro and golf because they can distance themselves from each other,” pahayag ni Lorenzana sa online nga press conference.
Ang mga dula nga magkaduol ang mga atleta, sama sa basketball, boxing, ug wrestling, magpabiling gidili ubos sa GCQ.
“Iyon kasing boxing, wrestling at saka iyong ano pa diyan ay hindi…contact sports iyan. Nagkakalipatan iyan at saka nag-aakapan pa. So wala pa tayong guidelines diyan dahil hindi pa authorized,” pulong ni Lorenzana.
Nanghinaut, hinuon, si Lorenzana nga ang mga contact sports basin mahimo na unyang madula kung mo-arang-arang na ang sitwasyon sa Covid-19.
“Maybe as we go down the road at medyo lumuwag-luwag iyong ating…pwede na iyan,” ingon niya.
Ang mga gym, fitness studio, ug uban pang mga pasilidad sa sports magpabiling sirado ubos sa GCQ.
Ang Metro Manila, Laguna, ug Cebu City gikatakdang ipaubos sa Modified Enhanced Community Quarantine (MECQ) sugod karong Mayo 16 hangtud Mayo 31.
Ang mga lugar nga gi-classify nga “moderate risk” ipaubos sa GCQ sugod usab karong Sabado hangtud sa katapusan sa bulan. (LBG)
