LALA, LANAO DEL NORTE –— Sakpan sa kapulisan sa munisipyo sa Lala nga aktong naggunit sa iyang kinawat nga kuarta sulod mismo sa tindahan ang suspek nga nailhang si Rommel Macabugto.
Sumala sa taho ni Police SSGT Elton Jacinto, nakadawat sila og taho gikan sa guardya sa Alfalan store nga nahimutang sa purok Ipil-ipil, Barangay Maranding nga dunay tawo nga misulod sa tindahan.
Sa ilang pagsuta sa taho, naabtan pa nila si Macabugto nga aktong naggunit sa salapi sulod mismo sa tindahan, ug gilayon kining gisikop sa kapulisan.
Gitaho ni Lanao del Norte Provincial Director Rene Solidarios ngadto kang PNP Regional Director 10 PBGen. Rolando Anduyan nga nahitabo ang pagpangawat bandang alas 3:45 sa kadlawon niadtong Domingo, Mayo 3.
Nabawi sa kapulisan sa kamot ni Macabugto ang bag color military green nga dunay sulod nga kuarta nagkantidad og 10,879 .
Gidayeg ni PCol. Solidarios ang PNP Lala sa malampusong pagkasikop sa suspek.
Anaa na karon sa kusťodiya sa Lala PNP ang suspek ug kini mag-atubang sa kasong robbery by use of force upon things. -Thata Roxas
