DAKBAYAN SA DABAW — Tulo ka tawo ang namatay samang laing upat ang samaran sa pagpanigbas sa usa ka membro sa ilang pamilya tungod sa kalagot ug pagdumot niadtong Mierkules sa gabii didto sa Barangay Rizal-3, Banga, South Cotabato.
Sumala ni Police Major Joseph Forro, hepe sa Banga PNP, Kaganinang udto nasikop na sa kapulisan ang suspetsado nga nagpailang usa ka Paul Bautista apan ang iyang tinoud nga pangalan si Gido Chemery Blatang, didto sa Dumaguil, Norala samtang paingon na kini sa Tacurong City.
Gi-akusahan si Blatang sa pagpatay sa iyang kapuyo, sa iyang onse (11) anyos nga stepson ug sa iyang ‘ugangan’.
Giila ni Forro ang mga biktima nga namatay nga sila si Jesmond Magno, 11, stepson sa suspek, ang iyang kaipon nga si Monlen Magno, 39, ug iyang ugangan nga si Lenny Magno, 60. Namatay gilayon si Jesond samtang si Lenny nadala pa sa hospital apan gi-deklarang dead upon arrival samtang si Monlen nakabsan usab sa iyang kinabuhi samtang ginatambalan sa hospital.
Samtang samaran ang ubang membro sa pamilya ni Magno nga nailhang sila si Edmund Magno, 60; Renante Magno, 42; Albert Ramos, 44; ug Chenie Ramos, 34, nga kauban sa panimalay.
Daling nasikop ang biktima human mihatag ug premyo nga P200,000, si Banga Mayor Alberto Palencia, sa tawo nga makahatag og inpormasyon aron masikop ang suspetsado.
Sumala sa taho sa kapulisan, nahitabo ang pagpanigbas mga alas 6:30 sa gabii niadtong Mierkules.
Sa inisyal nga imbistigasyon sa kapulisan, nahibaw-an nga nagtapok ang pamilya Magno apan nagpalayo si Blatang kanila, og sa panaghisgut sa pamilya, nadungog kuno ni Blatang iyang pangalan nga nahimong mitsa sa pagtuki sa daan na nilang away.
Kalit midoul ang suspek dala ang karit nga iyang ginagamit pagharvest sa lubi ug gilayong gipangtigbas ang mga biktima.
Daling misibat si Blatang, ug wala pa kini matagbaw, iya pang gitawag ang iyang kapuyo nga si Monlen ug nagbahad pa kini iyang hutdon ug pamatay ang iyang pamilya, apan human sa iyang tawag, namatay si Monlen.
Sa kasamtangan, nakig-alayon ang Banga PNP sa lungsod sa Glan, Sarangani, kay dunay nakataho kanila nga dunay usab kuno’y gitigbas si Blatang sa iyang lugar, pipila ka tuig na ang milabay.-Newsline
