DAKBAYAN SA DAVAO-— Mihatag na ang gobyerno sa Estados Unidos sa Maryland og inisyal nga $60 milyon nga pondo aron limpyohan ug masugdan na og tukod ang bag-ong tulay human nahugno ang Francis Scott Key Bridge sa Baltimore niadtong Martes.
Ang tulay dunay gitas-on nga 2.57 ka kilometro.
Ang pondo gikuha gikan sa emergency fund sa gobierno.
Ang tulay nahugno human kini gidaro sa Dali nga barko nga nawad-an og suplay sa kuryente samtang nagdagan.
Duha ka patayng lawas ang nakita human sa aksidente, samtang upat pa ka mga tawo ang padayong gipangita nga gituohang natanggong sa sakyanan ilawom sa semento ug puthaw nga nahulog sa tubig.
Ang pondo gipagawas human mihangyo si Maryland Gobernor Wes Moore og $60Milyon kaganina (Biyernes) ug sulod sa pipila ka oras giaprobahan sa Federal Highway Administration sa US Department of Transportation ang hangyo nga pondohan ang emerhensiyang trabaho.
Sagad mokabat pa og pipila ka adlaw aron mapagawas ang pondo. Apan, gibutyag ni Presidente Joe Biden sa mga tigbalita niadtong Martes nga iya nang gimanduan ang Federal government nga himoun ang tanan aron daling matukod pag-usab ang tulay.
Sa usa ka press conference, matud ni Gobernador Moore i-prayoridad nila ang pagpangita sa mga nawala nga trabahante sa konstruksyon nga nagpahigayon og repir sa tulay sa dihang ang naigo sa barko ang usa ka haligi bandang 1:30 niadtong Martes sa buntag.
Ang mga opisyal naglaum nga hawanan ang channel aron ipadayon ang mga operasyon sa pagpadala; pag-atiman sa mga trabahante, pamilya ug mga first responder nga apektado sa trahedya ug tukuron pag-usab ang tulay.
Ang Dali usa ka barko nga nagdala og 56 ka mga containers nagkarga og mga “hazardous materials”, dunay gitas-on nga halos sama ka taas sa Eiffel Tower ug ang Dali adunay “Key Bridge” sa ibabaw niini.
Ang Dali, usa ka barko nga nagdala sa banderasa Singapore ug paingon sa Sri Lanka, sa dihang nahitabo ang insidente.
Sumala sa mga taho, nawad-an og kuryente ang barko ug wala na makontrol ang dagan niini, hinungdan nga gidaro sa barko ang haligi sa tulay hinungdan nga nahagsa kini didto sa Patapsco River.
