Mga kapitan mag prayer rally, dili pa-aprobahan ni Presidente Duterte ang pagluwat ni Pulong

Emergency meeting of Davao city Barangay captain. Roger Galido, Oemor M. Bakirel, Robert Mendoza, Ralph Abella.-Photo-Courtesy of Barangay Captain Leo Aquino

DAKBAYAN SA DABAW, MINDANAW— Magmugna ug prayer rally ang mga kapitan ug barangay functionaries dinhi sa dakbayan ugma sa hapon aron hangyo-on si Presidente Rodrigo Duterte nga dili aprobahan ang “resignation” ni Bise Mayor Paolo Duterte.

“Ang Prayer rally nagtumong nga hangyo-on si Prisedente Duterte nga dili aprobahan ang pag-resign ni Vice Mayor Pulong kay among gikinahanglan ang iyang pagserbisyo sa dakbayan isip bise mayor,” matud pa ni Kapitan Robert Mendoza.

Ang prayer rally gikataho nga salmutan sa mokabat 3,500, kuyog ang  barangay kapitan, barangay kagawad, barangay functionaries ug mga residente sa dakbayan.

Miluwat sa iyang pagka-bise mayor si Paolo Duterte,  ang kinamagulangan nga anak ni Presidente Duterte tungod sa mga panghitabo sa iyang kinabuhi nga milambigit sa iyang unang kaminyoon ug kini nakaapekto sa iyang pagkatawo ug pagpanerbisyo sa dakbayan.

Ang suwat sa pagluwat gipadala na sa opisina ni Presidente Duterte sa Malakanyang niadtong Miyerkules pinaagi sa LBC, matud pa ni Mayor Sara Duterte-Carpio.

Apan, matud pa ni Harry Roque, ang opisyal nga tigpamaba sa Presidente “wala pa mipagawas og opinyon ang Palasyo”.

Si kapitan Mendoza nagbutyag nga nagkita sila ni kapitan Jimmy Salvador ug uban pang mga kapitan kagahapon ug nahiusahan nga maghimo ug prayer rally ug gani nakalukat na sila og permit sa ilang prayer rally.-Harold V. Pontongan/Newsline.ph