MOKAPIN sa 1.4 milyones na ang naulian gikan sa coronavirus disease (Covid-19) sa tibuok kalibutan, sumala sa talaan sa John Hopkins University sa America karong Lunes, Mayo 11.
Matud pa sa maong talaan, 1,408,705 na ka mga pasyente sa Covid-19 tibuok kalibutan ang nangaayo, samtang 282,684 ang mga nakalas sa gubat batok sa pandemiya.
Hinuon, ang talaan nagpakita usab nga kapin 4.1 milyones na ka mga tawo ang
natakdan sa maong sakit.
Ang Estados Unidos sa America (USA) maoy naka-rehistro sa pinaka-daghang nangaayo sa virus.
Ang mga natambalan nga pasyente sa America moabot na og 216,169, apan ang USA nagpabilin hinuon nga maoy pinaka-labihang naigo sa Covid-19.
Mokapin na sa 1.32 milyones ang mga kumpirmadong kaso sa America, kung diin
79,500 na usab ang mga nangamatay.
Sa Germany, 144,400 na ka mga pasyente ang naulian ug sa España moabot na sa 136,166, samtang 105,186 na ang mga nangaayo sa Italia.
Ang Turkey maoy nikumpleto sa Top 5 ka mga nasud kung diin daghan nga mga pasyente ang nakalupig sa sakit.
Adunay 92,691 ka mga pasyente ang naayo sa Turkey, apan 3,786 na usab ang nangamatay gikan sa 138,657 ka mga kumpirmadong kaso.
Adunay mga kaso sa Covid-19 nga natala sa 187 ka mga nasud sa kalibutan sukad ang virus mitungha sa Wuhan, China niadtong Disyembre. (LBG)
