ANG PHILIPPINE Olympic Committee (POC) nagplano nga mopalit og 100 ka bisikleta para ipanghatag sa mga miyembro sa national teams.
Si POC president Abraham Tolentino naglaum nga aprubahan kini sa POC Board, ilabi na nga ang pagbisikleta mahimo na unyang bag-ong pamaagi sa transportasyon pagsugod sa giingong “new normal.”
Matud pa sa hepe sa POC, ang pagbisikleta maayo usab nga paagi para sa pagmintinar sa pisikal nga kondisyon sa mga athleta.
“Obviously, bicycling, whether to commute to and from their training venues or even for leisure, is a good way for our national athletes to keep in good physical condition,” ingon ni Tolentino.
Tungod kay limitado ra ang paliton nga mga bisikleta, ang paghatag ipaagi sa “first-come, first-served basis.” Ang Pilipinas adunay kapin sa 1,000 ka mga national athlete.
Si Tolentino ang pangulo sa PhilCycling ug igsoon ni Senator Francis Tolentino nga miawhag sa Department of Transportation nga tugotan ang paggamit og bisikleta sa mga dagkong karsada sama sa mga highway.
Niadtong Martes, Mayo 19, naghugpong ang mga hingtungdan, o “stakeholders” sa cycling alang sa pagdasig sa paggamit sa bisikleta sa panahon nga matapos na ang coronavirus disease (Covid-19) pandemic.
Giduso sa mga lider sa 7Eleven, Air21, Go for Gold, LBC Ronda Pilipinas, ug Navy-Standard Insurance ang paghimo og mga “bike lanes” sa mga kadalanan dungan sa pagbuhat og mga lagda alang sa pagbisikleta sa karsada. (LBG)
