DAKBAYAN SA DAVAO — Daling gitabang sa mga estudyante ug opisyal sa Ateneo de Davao University Matina campus ang usa ka 14-anyos nga estudyante niadtong Martes Enero 10, 2023, bandang alas 10:00 sa buntag didto sa Martinez Sports Center sa matina Campus.
Sa inpormasyon nga nakuha sa Newsline, nahitabo ang insidente sulod sa Ateneo de Davao University, Matina Campus, apan, wala dayon nanawag sa kapulisan ang mga opisyales sa unibersidad.
Nasayud nalang ang kapulisan sa dihang dunay nagpakabanang lungsuranon ang mitawag kabahin sa panghitabo.
Sa dihang gisuta sa Newsline ang lugar, Nakita sa crew nga bisan ang kapulisan wala pasudla sa unibersidad kay matud pa nag-meeting pa.
Human sa usa ka oras og kapin, gipasulod na ang kapulisan.
Nadala pa ang bata sa hospital, apan, nakabsan gihapon kini sa iyang kinabuhi kagahapon bandang alas 4:00 sa hapon.
Usa ka membro sa pamilya ang nagpost sa social media ug mihangyo nga hatagan sila og panahon ang ilang pamilya ug respetuhon ang ilang pagpakahilum sa panahon sa ilang pagbangutan.
Sa pahayag sa Ateneo de Davao mao kini ang ilang gibutang:
“Psychological first aid is being given to students, teachers and staff by the JHS Wellness and Testing Center as necessary. The center is also planning crisis counseling for parents.”
Ang kapulisan wala pay gihatag nga pormal nga pahayag kay matud nila, nagsige pa sila og tahi sa mga inpormasyon nga ilang nakahalap.
Nasayran sa Newsline nga wala usab pasudla sa hospital ang kapulisan kay mihangyo ang pamilya nga ilang duyugan ang ilang minahal sa kinabuhi.
Makita sa social media post sa estudyante nga murag duna kini gihambin nga problema nga daw walay siyay kasumbungan o kaadtuan.
Nahitabo ang insidente usa ka adlaw una magsugod ang eksaminasyon sa mga estudyante.-Paul T. Palacio
