DAVAO CITY — Mokapin sa 3,000 na ka mga bata ang nakapahimulos sa feeding program nga gitanyag sa mobile kitchen sa Davao de Oro Provincial Government sukad kini gisugdan niadtong Abril 24.
Ang “Kusina ng Kalinga” (KNK) program sa probinsiyal nga kagamhanan tumong nga mopakaon sa mga 14,000 nga kabataan og mga masustansya nga pagkaon.
Sa usa ka pamahayag nga giluwatan karong Martes, Mayo 5, si Governor Jayvee Tyron Uy nanghinaut nga ang ilang programa makahatag unta og kahupayan sa mga pamilya nga naapektuhan sa krisis nga nahimo sa coronavirus disease (Covid-19).
Si Gov. Uy nag-ingon nga padayon silang modalit og sustansiyadong mga pagkaon sa mga kabataan, labi na karon sa panahon sa pandemya.
“We will continue to feed the children who need nutritious food, especially that we are facing a health crisis now,” sulti sa gobernador.
Si Uy ug ang mga empleyado sa Provincial Governor’s Office migahin sa ilang sweldo para pagsuporta sa feeding program.
Ang mobile kusina unang miadto sa Barangay Union sa lungsod sa Monkayo niadtong Abril 24.
Ang ikaduhang lugar nga giadto sa mobile kusina niadtong Abril 27 mao ang New Bataan Resettlement Project 1 sa Barangay San Roque sa lungsod sa New Bataan.
Ang programa gisuportahan sa Davao Multi-Purpose Seed Producers Cooperative, nga mihatag og 23 ka sako nga bugas para sa mobile kusina. (LBG)
