DAKBAYAN SA DABAW — Ang “Kadiwa on Wheels” nga programa sa Department of Agriculture (DA) nakahalin og kapin sa P4 milyones nga mga produkto gikan sa mga mag-uuma ug mangingisda sa Dabaw.
Sumala pa sa press release nga nadawat sa NewsLine niadtong Sabado, Abril 25, ang 16 ka grupo sa mga mangingisda ug mag-uuma mikita na og P4.8 milyones sukad pagsugod sa programa niadtong Abril 3.
Ang maong programa nakatabang kaayo og dako sa mga mag-uuma ug mangingisda nga naglisod sa pagbaligya sa ilang mga produkto tungod sa enhanced community quarantine (ECQ).
“Ang ‘Kadiwa on Wheels’ napahimuslan gyud sa mga pamilya nga ang panginabuhian naapektuhan sa ECQ,” matud pa ni Juvy Pregon, market specialist sa DA-11.
Ang maong programa dako usab ang natabang sa mga lumolupyo nga naglisod og palit sa ilang mga batakang panginahanglan.
Ingon ni Pregon nga tungod sa kalampusan sa “Kadiwa on Wheels,” pipila sa mga barangay mihimo usab og susamang programa para pag-alibyo sa problema sa pagkaon sa ilang komunidad.
Ang DA-11 nag-ingon nga ang maong programa magpadayon hangtud nga malibkas na kwarentina.
Sa laing bahin, si DA-11 information officer Noel Provido nagpahibalo usab nga ang publiko mahimo pud nga makapalit og mga produktong agrikultura pinaagi sa ilang online “E-Kadiwa” nga programa. (LBG)
