DAKBAYAN SA DABAW (Enero 29) — Patay ang suspetsadong carnapper nga si  William Bucod Millana, 36, taga Crossing Highway Town Site Brgy. Zone 2 Sta. Cruz Davao Del Sur, human kini nakigpinusilay sa mga otoridad alas 12:30 kagahapon sa udto, samtang gimaneho na niini ang iyang gikawat nga usa ka Toyota Hilux Pick up, dunay plate number KDV 769 color Dark Gray.
Sumala ni Chief Inspector Jerome De Guzman, Station Commander sa TOril POlice Precinct, nakadawat sila ug tawag nga dunay usa ka sakyanan ang gikawat samtang naka parkig sa gawas sa usa ka Mall sa Toril ug gimaneho paingun sa Binugao, hinungdang nakig-coordinate na dayon sila sa Task Force Davao Checkpoint arun nga maharang.
Pag-abot sa TF-Davao checkpoint sa Sirawan, gipara sa mga sundalo si Milana apan imbis nga mohunong, gipabuthan niya  ang mga sundalo ug mipasutoy ug padagan.
Gigukod sa pulis ug sundalo si Milana ug didto na nila naapsan, Sirawan, imbes nga musurrender nakigpunisilay pa kini, hinungdan sa iyang kamatayon.
Sumala sa driver sa Hilux nga si Elizer Curaza, iyang gipark ang pick up nga wa niya gipalong arun lang nga mukaon sa usa ka karinderya, wa niya damha nga dunay musakay ug mukawat sa pick up.
Narecover sa Crime Scene ang usa ka smith and wesson nga .38 revolver nga dunay upat ka mga bala ug duha ka mga fired cartridge sa .38 revolver.-Reeya Nuñez/NewsLine.ph
