DABAYAN SA DABAW— Nakita na sa Talomo police kaganinang alas 6:00 sa buntag ang usa ka nagpositibo sa coronavirus-19 (Covid-19) human sa unom ka adlaw niining pagtago-tago sukad sa iyang pagkagiw gikan sa Queensland isolation facility niadtong Mayo 9.
Si Talomo Police Chief Col. Ronald Lao nagbutyag sa Newsline, nga nagtago si Arani Hajiba sulod sa usa ka abandonadong truck doul sa sapa sa Matina Crossing, pipila ka metro lang gikan sa ilang istasyon.
“Among namatikdan nga naay tao sa sulod sa truck, among gikuhaan ug picture, unya sa among pag-check navalidate nga sya si Hajiba, maong nitawag dayon mi sa 911, og gikuha siya, gibalik namo sa Queensland, pag-abot didto ni confirm sab ang security guard na siya ang ninglayas nga pasyente,” saysay ni Lao.
Pulos nakasout ug PPE ang mga operatiba nga nagkuha kang Hajiba.
Madungog sa video ang tingog ni Lao nga nangutana kung ang babaye ba si Arina ug mitando kini.
Gimanduan ni Lao nga molingkod lang si Arina ug maghulat sa sakyanan kay dalahon siya sa doktor ug patambalan aron kini maayo.
Gitagaan og pagkaon ang babaye ug misunod usab kini sa hangyo kaniya ni Lao nga maghulat sa sakyanan.
Kung tuohan ang mga pasiunang istorya ni Hajiba sa kapulisan, nidangop kuno siya sa usa ka komunidad sa mga Badjao sa Matina Aplaya, pagkahuman nagsige nalang kini og pangita og kataguan.
Subay sa kultura sa mga Badjao, mahadlok kini sila sa usa ka siradong lugar tungod kay naanad sila nga naa sa dagat kay naa didto ang ilang panginabuhian, ug taas ang ilang malantawan.
Sa sitwasyon karon nga dunay hulga sa coronavirus, ang tanang suspetsado ug tanang nagpositibo sa Covid-19 ibutang gayud sa isolation facility aron malayo sila sa mga tao nga posibleng matakdan sa maong kagaw.-JAP/Newsline
