‘DuterTen lang’: Awhag sa kandidato sa PDP sa ilang mga supporters ug di-iapil ang gi-indorso ni VP Sara Duterte

DAKBAYAN SA DAVAO (Abril 17) –Ubay-ubay sa mga kandidato pagka-senador sa ‘DuterTen’ ang nanawagan sa suporers nga napulo lang ang ilang iboto karon umaabot nga eleksyon kay kini matud pa ang mga kandidato nga opisyal nga gi-endorso sa PDP-Laban.

Nanawagan ang mga kandidato , human gi-endorso ni Bise Presidente Sara Duterte ang kandidatura nilang Senador Imee Marcos ug Las Piñas Rep. Camille Villar.

Atol sa proclamation rally sa DuterTen, gi-awhag ni doctor-vlogger nga si Richard Mata, nga napulo lang ang iboto kay kini ang labing maayong panimalos sa pagkadakop ni kanhi Presidente Rodrigo Duterte ug ibito lang ang kandidato sa PDP-Laban.

“The best revenge is vote straight Duter-Ten only. Focus sa bag-o. Wag sa lumang sikat na tahimik na kasanib nga nag kulong kay Tatay Digong,” saysay ni Mata.

Sa Facebook live, gisabatbat ni Atty. Raul Lambino ang unahon nila og boto ang ‘DuterTen’ kaysa ubang mga kandidato sa pagkasenador.

“DuterTen kay sampu po kaming kandidato sa PDP Laban ug kami lang ang sampu nga inendorso ni Tatay Digong,” saysay ni Lambino.

Gitimbang-timbang usab ni kanhi PAGCOR Board Member Jimmy Bondoc ang hisgutanan, nga nitumbok nga lahi ang endorsement sa PDP-Laban sa personal nga endorsement nila ni VP Sara ug PDP-Laban President Senator Robinhood Padilla.

“Ang opisyal nga pag-endorso mao ang proseso sa partido, ug tinuod nga gusto ipaboto sa inyo nga mga lider, dugang ni Bondoc.

Kini human gi-endorso ni VP Sara ang kandidatura nilang Marcos ug Villar. Sa susama usab nga gi-endorso ni Padilla si Marcos, nga giklaro nga kini usa ka personal nga pagpili ug dili sa partido.

Ang bag-o nga mga survey nagpakita nga silang PDP reelectionist Senador Bong Go ug Bato Dela Rosa komportable nga naglingkod, samtang ang SAGIP Partylist Rep. Rodante Marcoleta ug ang aktor nga si Phillip Salvador nakasulod usab sa winning circle.

Samtang ang ubang kandidato sa PDP-Laban, nagpabilin nga wala nakasulod sa Top 12, bisan pa sa pag-angkon sa statistical points human sa pagkasikop ni kanhi Presidente Rodrigo Duterte.