DAKBAYAN SA DAVAO-— Papaulion gilayon sa Bureau of Immigration ang usa ka Hapon nga dugay nang gipangita sa Tokyo human kini nanagit ug nangataki sa usa ka babaye didto sa Japan upat ka tuig na ang milabay.
Sa taho nga nakuha sa Immigration, si Hirotaka dunay Warrant of Arrest kay nalambigit sa pagdagit ug paglugos sa usa ka babaye sa Osaka niadtong 2019 ug iyang gisupak ang Penal Code sa Japan.
Giila ni Immigration Commissioner Norman Tansingco ang pugante nga si Sugihara Hirotaka, 38-anyos, kinsa gidakop niadtong Lunes sa dalan Dr. A. Santos Ave., San Dionisio, Parañaque City sa mga operatiba sa fugitive search unit (FSU) sa BI.
Ang pagdakop kang Hirotaka subay sa mando sa Japan Embassy to the Philippines tungod sa order sa Korte didto sa Japan niadtong tuig 2021.
Matod ni Tansingco nga si Hirotaka ibalik sa Japan tungod kay didto niini atubangon ang iyang kaso ug dili na kini pabalikon pa sa Pilipinas tungod sa iyang kriminal nga rekord.
Nasayran sa mga awtoridad sa Pilipinas nga niabot sa Manila si Hirotaka niadtong Marso 16, 2019 isip usa ka turista aron makalikay sa iyang kaso sa Japan ug wala na kini mopauli hangtud nga siya nadakpan.
“Suspek usab siya sa sunod-sunod nga bayolenteng insidente sa pagdagit ug pagpanglugos sa ubang mga menor de edad sa Japan,” matod ni BI-FSU acting chief Rendel Ryan Sy.
Ang pugante kasamtangang gitanggong sa BI warden facility sa Camp Bagong Diwa, Taguig City samtang nagpaabot sa pagpatuman sa iyang deportasyon.
