DAKBAYAN SA DABAW — Ang Davao City Government motabang sa pagpauli sa mga na-stranded nga tawo sa ilang tagsa-tagsa ka lungsod, ciudad, ug probinsiya kung sila tugotan nga makabalik sa ilang mga lokal nga kagamhanan.
Kini ang gipasalig ni Davao City Mayor Sara Duterte atol sa iyang interbyu sa Davao City Disaster Radio niadtong Sabado, Abril 25.
“Wala mi problema nga mogawas mo og Davao City. We can assist you nga mogawas og Davao City but please make sure nga dawaton mo didto sa lugar na paulian ninyo,” sulti ni Mayor Duterte.
Sa laing bahin, ang mayor nag-ingon nga dili pa sila makatabang sa mga Dabawenyo nga na-stranded gawas sa rehiyon tungod kay dili pa bukas ang mga tugpahanan ug pantalan para sa mga pasahero.
Hinuon, ang kagamhanan sa dakbayan nangandam na ug naka-umol na og sistema para pagtabang sa mga na-stranded gawas sa rehiyon nga makapauli sa Davao.
Matud pa ni Duterte, ila usang gipadaplin ang ilang planong pagtabang sa mga na-stranded nga Dabawenyo human nga gipaubos sa nasyonal nga kagamhanan ang Davao City
ug uban pang mga dakbayan sa extended Enhanced Community Quarantine (ECQ).
Sumala pa ni Mayor Sara, kinahanglan nga hatagan og gibug-aton ug tumanon ang kamanduan sa nasyonal nga kagamhanan. (LBG)
