DAKBAYAN SA DABAW —- Nanawagan na ang lokal nga panggamhanan ning dakbayan sa mga operator ug drayber sa public utility jeepney nga maapektuhan sa ‘phase out’ nga andamon na nila ang ilang mga dokumento kabahin sa ilang prangkesa aron marepaso na kini.
Nagpagawas og abiso ang dakbayan alang mga apektadong operators ug draybers aron masusi na kini sa Land Transportation Franchising and Regulatory Board (LTFRB) XI ug masulod isip beneficiary sa assistance nga ihatag sa gobyerno luyo sa pagpatuman sa High Priority Bus System (HPBS) Project.
Gitagaan og hangtud sa Agosto 28, 2020 sa alas 5:00 sa hapon, ang apektadong mga operator ug drayber aron i-andam ang ilang dokumento aron kini marepaso sa LTFRB ug sa CSSDO alang sa pagproseso sa ilang benepisyo.
Subay sa LTFRB Board Resolution No. 134, series of 2020, gimanduan ang PUJ Operators nga dunay rota paingon sa Catalunan Grande ug Toril nga i-update ang ilahang information alang sa Social Development Package nga i-hatag sa lokal nga panggamhanan.
Matud ni Danny Crayon, usa sa apektadong mga drayber, nadawat na nila nga walaon sila sa karsada aron mapatuman ang HPBS ning dakbayan “Andam na man ko, kay mao man ang desisyon sa gobyerno, hatagan man sab daw mi og benepisyo, so okay ra.”
Ang mga operator ug drayber nga kung dili nila masumitir ang mga papeles posibleng dili na sila mahatagan sa mga benepisyo nga angayang ihatag kanila.-Newsline.ph
