DAKBAYAN SA TAGUM — Nagtinabangay ang mga residente sa Davao del Norte aron mag-repak ug mga pagkaron, maghimo ug maghimo og ‘improvized’ face masks alang sa mag pamilya ug mga nagtagad sa mga pasyente nga natabuyan ug coronavirus (COVID-19).
Kini, human nanawagan si Davao del Norte Governor Edwin Jubahib sa iyang katawhan nga modoyug sa kawsa sa pagbatok sa coronavirus pinaagi sa ilang panahon alang mga frontliners.
Ang tanang nagboluntaryo, gikuhaan una ug body temperature, gipasout ug fase masks ug gipasulod sa ‘social distancing samtang sila nag-repak o nagtahi sa mga ‘face masks’.
Matud ni Jubahib “Ang pagtinabangay ug pagbayanihan alang sa katawhan makahatag ug dugang kusog alang sa kampanya batok coronavirus– dili na angayan mogawas sa mga balay ang pamilya sa mga PUIs ug PUMs, hatdan natu sila sa ilang balay, sa samang higayon, atong giputol ang pagkatag sa posibleng matakbuyan sa kagaw.”
Niadtong milabayng simana, usa ka grupo sa mananahi ang gihangyo ni Jubahib nga maghimo ug 16,000 ka face masks aron ipanghatag sa frontiners, kaniadtong Sabado gi-awhag na usab niya ang katawhan nga magboluntaryo aron mag-repak sa mga pagkaon alang sa 294,673 ka pamilya sa tibuok probinsya ug i-prayoridad ang dunay PUI, PUM ug mga “WW” (Walang-Wala) nga pamilya sama niadtong walay permanenteng trabaho.
Ang giandam nga mga food packs nga gisudlan ug tig-tulo ka kilong bugas, duna sab duha ka latang tinapa ug butangan sab kini ug sabon ug hand sanitizer. Ang unang hugna sa mga food packs moabot ug 33,000. –Jap
