DAKBAYAN SA DABAW — Gigamit nga pangbayad sa utang — kini ang migawas sa survey nga gihimo sa Department of Social Welfare and Development Office (DSWD) kauban ang United Nations World Food Program (WFP) ngadto sa mga beneficiaries sa Special Amelioration Program kon SAP, ug giunsa nila sa paggamit ang cash assistance nga ilang nadawat panahon sa krisis nga hatud sa coronavirus.
Migawas nga 58 porsyento sa mga respondents miingon nga ilang gibayad sa ilang utang.
Samatang 92 porsyento nagingon nga ilang gipalit og pagkaon ang kuarta kay mao ang ilang prioridad;
67 porsyento ang namalit og pagkaon nga barato ug dili mahal.
Tulo sa upat ka mga respondents nagingon nga miubos ilang pangita tungod sa pandemya nga di sila makatrabaho tungod sa mga travel restrictions.
Si Danilo Canyon, 56, mag-uuma nagbutyag sa Newsline.ph “Pagkadawat naku, ako dayong gibayad sa among nautangan para makautang na sab mi, wala may klaro ang kita karong panahuna, barato kaayo ang presyo sa among humay unya og dili namu bayran among utaang, dili na mi makautang sa tindahan.”
Matud ni Canyon mokabat sa P3,510 ang yang nabayran nga utang sa tindahan sulod sa duha ka bulan, gawas pa kini sa iyang gibayad sa iyang arawan sa torko “Sa 5-6 gyud napaingon ang sobra kay nangutang man mi.”
Sa mga nawad-an og trabaho, 42 porsyento niini anaa sa transport sector ug laborers; 11 porsyento sa mga respondents nasayran nga dunay nutrition-deficient diets; 83 porsyento ang nangita og laing paagi sama sa pagbaligya sa ilang mga butang, nanghulam og kuarta ug wala na namalit og bisan unsa.
May mga nagingon usab nga ilang gipalit og hygiene kits ug sa ilang panginahanglan medikal sama sa medisina ang kuartang ilang nadawat.
Alang kang DSWD Secretary Rolando Bautista, ang resulta sa survey nagpakita nga nakab-ot sa SAP ang tinguha niini nga matabangan ang mga pobre sa krisis nga ilang nasinati tungod sa pandemya.
Ang survey gitawag og “Remote Household Monitoring Survey on the Impact of the Covid-19 Pamdemic and the Implementation of the Philippine Government’s Social Amelioration Program”, diin dunay 3,600 ka mga household respondents nationwide nga gihimo sa bulan sa Hunyo hangtud Augusto.
Hinuon, giangkon sa DSWD nga 15% sa mga respondents dili mga SAP Beneficiaries nga nakatabang sab aron mahibal-an ang kahimtang sa mga wala makadawat sa SAP labi na pag-abot sa pagkaon.
