DAVAO CITY — Usa ka komyunistang rebelde ang namatay human sa 15 ka minutong pinusilay kontra sa militar niadtong Martes, Abril 7, didto sa lungsod sa Pantukan, Davao de Oro.
Si 2Lt. Kim Carlos, civil-military operations officer sa Philippine Army 71st Infantry Battalion (71IB), nagkanayon nga ang engkwentro nagsugod human niresponde ang mga sundalo sa mga taho nga dunay mga miyembro sa New People’s Army (NPA) sa Sitio Matinglob, Barangay Tagdangwa.
Sumala pa sa mga taho nga nadawat sa 71IB, ang mga rebelde nangayo kuno og mga pagkaon sa mga lumolupyo sa maong lugar, sulti ni Carlos sa Philippine News Agency niadtong Miyerkules, Abril 8.
Matud pa ni Carlos ang mga rebelde nagpaboto dayon sa ilang mga armas sa pag-abot sa mga nirespondeng militar ug kapolisan sa maong lugar.
Ang namatay nga rebelde giingong gibiyaan lang sa iyang mga kauban nga nag-iyahay lang og panagan.
Nakuha sa lugar sa engkwentro ang mga dagkong kalibre sa armas, mga bala, mga subersibong dokumento, medical supply, ug lain pang ubang ebidensiya.
Ang maong pag-atake sa mga rebelde usa ka pagsupak sa “reciprocal ceasefire” nga gideklarar sa Communist Party of the Philippines-NPA-National Democratic Front ug sa kagamhanang Duterte niadtong Marso 29, aron makatabang ang militar sa pagsumpo sa coronavirus disease (Covid-19).
“The ceasefire was clearly violated by the NPA members on the ground,” ingon ni Carlos.
Sa laing bahin, si 71IB commander Lt. Col. Sonny Gonzales nag-ingon nga siya nasagmuyo sa nahitabong engkwentro.
Si Gonzales nanawagan usab sa mga rebeldeng NPA nga mo-surrender na lang unta ug motabang sa gubat batok Covid-19.
