DAKBAYAN SA DABAW (Hunyo 3) — Namula ang mata ug nagkurog ang tingog ni Honeylet Avanceña, tungod sa pagpugong sa iyang luha, sa dihang iyang gisaysay ang kinabuhi isip usa ka Overseas Filipino Workers (OFW) sa tigum didto sa Japan niadtong milabayng Mierkules.
Si Honeylet gihangyo sa mga organizer nga ipaila si Presidente Rodrigo Duterte sa atubangan sa mga OFW, usa pa niya gihimo ang iyang tahas, gisaysay niya ang kinabuhi sa OFW—kinabuhi nga iyang naagian samtang siya nagtrabaho isip nars didto sa Istados Unidos.
Nagtrabaho si Honeylet sa usa ka hospital sulod sa upat ka tuig, nagdisider nga mopauli tungod naburos na siya kang Veronica kon Kitty, ilang anak ni Presidente.
Gisaysay ni Honeylet ang kamingaw, kalisod ug mga pag-antos sa usa ka OFW–nga maskin kapoy na kaayo-motrabaho gihapon aron naay ikapadala sa sa pamilya sa Pilipinas, aron matubag ang mga panginahangalan sa mga anak ug pagkaon sa panimalay.
Luyo niining tanan, matud ni Honeylet nagpabiling lig-on ang mga OFW, butang nga ikapasigarbo sa mga OFW .
“Maskin kapoy na kaayo, kinahanglan imong himoun tanan aron mahuman ang imong trabaho, mawala ang kakapoy inig atubang sa trabaho tungod kay-isip Pilipino nahibalo ka nga kinahanglan maayo ang resulta sa imong tahas,” saysay ni Honeylet.
Ang mga OFW, matud pa ni Honeylet, dili lang bayani, apan, mga modelo sa maayong pamatasan sa mga FIlipino , hinungdan nga nagustuhan sila sa ilang mga langyawng giserbisyohan.
Sa iyang pamulong, gibutyag ni Duterte nga kapalaan na ni Honeylet nga mahimong ‘First Lady’ sa pilipinas.-ezc/NewsLine.ph
