OZAMIZ CITY–SUGDAN na ang pagtukod sa Panguil Bay Bridge (PBB) karong Enero 2021, base sa impormasyon gikan sa Department of Public Works and Highways (DPWH).
Ang final design sa 3.7 kilometros nga tulay gikatakdang matapos karong bulan sa Disyembre ug human niana sugdan na ang pagtukod sa maong tulay.
Niadtong bulan sa Agosto 2020, gipadayag sa DPWH nga kasamtangan nga nagpahigayon sila sa geotechnical survey alang sa design sa PBB.
Ang PBB nagkatindad og P7.375 B.
Kon matapos na ang pagtrabaho sa PBB mao na kini unya ang labing taas nga tulay sa Philipinas ug maapsan na ang gitas-on sa San Juanico Bridge sa Eastern Visayas nga adunay gitas-on nga 2.164 kilometros.
Pinaagi sa PBB maminosan ang oras sa pagbiyahe gikan sa Tangub City Misamis Occidental ug Tubod, Lanao del Norte gikan sa duha ug tunga sa oras mahimo na lang kini nga 7 ka minutos.
Ang PBB gipunduhan pinaagi sa paghulam og kuwarta sa Pilipinas ngadto sa Korean Export Import Bank.
Sa iyang kabahin, gipadayag ni DPWH Secretary Mark Villar nga ang PBB maoy katumanan sa saad ngadto sa katawhang Pilipino nga motukod og tulay aron hapsay ang pagbiyahe ngadto sa ubang dapit ilabina sa Northern Mindanao.
Gipadayag usab ni Misamis Occidental 2nd District Congressman Henry Oaminal nga ang nagpadayon karon ang implementasyon sa maong proyekto ug kon matapos na ang pagtrabaho niini mas sayon na alang sa katawhan sa Misamis Occidental nga makatabok sa Lanao del Norte ug vice versa aron ang ilang mga parodukto mahatod ngadto sa merkado.
Kahinumduman nga mismong si Presidente Rodrigo Duterte maoy nanguna sa ground breaking sa PBB niadtong Nobiyembre 28, 2019 sa Tubod, Lanao del Norte. -Neptalie Batolenio
