DAKBAYAN SA DAVAO-— Gibasura ni Presidente Ferdinand R. Marcos Jr. ang mga pasangil batok kaniya ni kanhi ahente sa Philippine Drug Enforcement Agency (PDEA) nga si Jonathan Morales, kinsa iyang gibansagan nga “professional liar” kon Bakakon.
Sa usa ka interbyu sa media atol sa General Santos City niadtong Biernes, si Marcos miingon nga dili siya motuo sa pag-angkon ni Morales sa ilegal nga drugas batok kaniya, tungod kay iyang gipakasama ang kanhi ahente sa PDEA sa usa ka jukebox nga magtugtog og bisan unsang kanta nga adunay bayad.
“Mahirap naman hatagan ug importansya ‘yan. Kini nga tawo usa ka propesyonal nga bakakon. Parang jukebox. Basta maghulog ka nga pera bisag unsay gusto nimo, kantahan niya. Kaya walang saysay (It’s hard to give it importance. This fellow is a professional liar, like a jukebox. As long as you pay, he will play whatever song you want. That is why it’s pointless),” matod ni Marcos.
Gikwestiyon usab ni PBBM ang rekord ni Morales nga nadaot sa daghang kaso sa korte, bakak nga mga testimonya, ug mga reklamo sa paglambigit sa mga inosenteng indibidwal.
Si Morales gi-dismiss sa PDEA tungod sa dishonesty ug misconduct ug karon nag-atubang og daghang legal proceedings.
Ang Senate Committee on Public Order and Dangerous Drugs nagpahigayon og mga hearing sa giingong pag-leak sa confidential nga mga dokumento sa PDEA nga naglambigit kang Presidente Marcos sa paggamit sa ilegal nga drugas.
Ang PDEA mismo nihimakak na sa giingong mga dokumento nga gipresentar ni Morales nga wala.
Si PDEA Director General Moro Virgilio Lazo kusganong gibalibaran ang mga pangangkon ni Morales, nga nag-ingon nga ang mga dokumento nga gikuwestiyon, lakip ang usa unta nga pre-operation report ug awtoridad sa pag-operate, wala maglungtad.
Si Lazo niingon nga ang mga alegasyon ni Morales “fabricated” ug “walay basehanan,” nga nagpasiugda nga ang Senate Committee on Public Order and Dangerous Drugs kinahanglan nga dili magsalig sa testimonya gikan sa usa ka indibidwal nga kaniadto nakahimo og perjury pinaagi sa pagtago sa iyang pagkataktak sa katungdanan gikan sa Philippine National Police ( PNP) atol sa iyang aplikasyon sa PDEA.
Gikondenar sa mga senador ang testimonya ni Morales tungod sa kapakyas pagmatuod sa mga alegasyon sa ilegal nga drugas batok kang Presidente Marcos ug aktres nga si Maricel Soriano
